នាព្រឹកថ្ងៃទី១៨ ខែមេសា ឆ្នាំ២០១៧ នៅវត្តសំរោងធំ ភូមិសំរោងក្អែរ ឃុំសំរោងធំ ស្រុកកៀនស្វាយ ខេត្តកណ្តាល មានរៀបចំពិធីសំណេះសំណាលជាមួយប្រជាពលរដ្ឋចំនួន ៥ ភូមិ គឺ ភូមិព្រែកត្រែង ភូមិព្រែកត្រែង២ ភូមិសំរោងក្អែរ ភូមិសំរោងក្អែរ២ ភូមិសំរោងក្អែរ៣ ឃុំសំរោងធំ ស្រុកកៀនស្វាយ ក្រោមអធិបតីភាព ឯកឧត្តម ម៉ៅ ភិរុណ អភិបាលនៃគណៈអភិបាលខេត្តកណ្តាល និង ង៉ោ សុវណ្ណ រដ្ឋមន្ត្រីប្រតិភូអមនាយករដ្ឋមន្ត្រី រដ្ឋលេខាក្រសួងយុត្តិធម៌ និងជាប្រធានគណៈពង្រឹងមូលដ្ឋានឃុំសំរោងធំ និងឃុំគគីរធំ។ សមាសភាពអញ្ជើញចូលរួម មាន៖ ឯកឧត្តម លោកជំទាវ សមាជិកក្រុមប្រឹក្សាខេត្ត , ឯកឧត្តម លោកជំទាវអភិបាលរងខេត្ត, លោក លោកស្រីប្រធាន អនុប្រធានមន្ទីរ អង្គភាព ជុំវិញខេត្ត, ក្រុមប្រឹក្សា និងគណៈអភិបាលស្រុក, កងកម្លាំងទាំងបីថ្នាក់ខេត្ត និងស្រុក, ក្រុមប្រឹក្សាឃុំ, មន្ត្រីពាក់ព័ន្ធថ្នាក់ខេត្ត និងថ្នាក់ស្រុក ព្រះសង្ឃ និងប្រជាពលរដ្ឋ ប្រមាណ ជិត ១១២៥ នាក់។
*បន្ទាប់ពីរបាយការណ៍ស្តីពីស្ថានភាពទូទៅ ស្ថានភាពសេដ្ឋកិច្ច សង្គមកិច្ច សន្តិសុខសណ្តាប់ធ្នាប់ ការងារត្រៀមរៀបចំការបោះឆ្នោតជ្រើសរើសក្រុមប្រឹក្សាឃុំ ការងារអភិវឌ្ឍមូលដ្ឋាន ការងារផ្តល់សេវាជូនប្រជាពលរដ្ឋ ការប្រឈម និងសំណូមពរ ក្នុងឃុំសំរោងធំ រួចមក ឯកឧត្តម ង៉ោ សុវណ្ណ បានមានប្រសាសន៍សំណេះសំណាលទៅកាន់អង្គពិធី ដោយបានអំពាវនាវដលប្រជាពលរដ្ឋសូមអញ្ជើញទៅចូលរួមបោះឆ្នោតអោយបានគ្រប់ៗគ្នា នៅថ្ងៃទី៤ ខែមិថុនា ឆ្នាំ២០១៧ ខាងមុខ និងបានគូសបញ្ជាក់អំពីគម្រោងនានាដែលក្រុមការងារគណៈពង្រឹងនឹងអនុវត្តនៅក្នុងឃុំសំរោងធំ និងបញ្ហាប្រឈមសំខាន់ដែលឃុំសំរោងធំបានជួបប្រទះ។
*តមក ឯកឧត្តម ម៉ៅ ភិរុណ អភិបាលនៃគណៈអភិបាលខេត្តបានបញ្ជាក់ពីវត្តមានរបស់ឯកឧត្តមនៅក្នុងឃុំសំរោងធំក្នុងរយៈពេល១ ខែនេះ គឺបានចំនួន០២ លើកហើយ គឺនៅថ្ងៃទី១៨ ខែមីនា ២០១៧ និងនៅថ្ងៃនេះគឺថ្ងៃទី១៨ ខែមេសា ឆ្នាំ២០១៧។ ឯកឧត្តមបានបន្តលើកឡើងពីសារៈសំខាន់នៃសន្តិភាព ហើយអំពាវនាវដល់ប្រជាពលរដ្ឋត្រូវចូលរួមក្នុងការថែរក្សានូវសន្តិភាពទោះបង់ក្នុងតម្លៃណាក៏ដោយ ក្នុងនោះត្រូវចូលរួមក្នុងការថែរក្សាស្ថេរភាពនយោបាយ, ស្ថេរភាពសេដ្ឋកិច្ច, ស្ថេរភាពខាងសន្តិសុខ។ ក្នុងនោះឯកឧត្តមានជម្រាបជូនបងប្អូនប្រជាពលរដ្ឋអំពីគោលនយោបាយសំខាន់ៗសម្រាប់អភិវឌ្ឍឃុំ សង្កាត់ឆ្នាំ ២០១៧-២០២២ របស់គណបក្សប្រជាជនកម្ពុជា។
*ក្នុងឱកាសនោះ ឯកឧត្តមអភិបាលបានណែនាំអោយ៖
+ អាជ្ញាធរស្រុក និងសមត្ថកិច្ចពាក់ព័ន្ធត្រូវចុះសិក្សាប្រមូលទិន្នន័យអោយបានច្បាស់អំពីប្រជាពលរដ្ឋដែលកំពុងមានទំនាស់ជាមួយក្រុមហ៊ុនសុវណ្ណភូមិ លើផ្ទៃដី ៨៥០ ស្ថិតនៅភូមិសំរោងក្អែល ឃុំសំរោងធំ ស្រុកកៀនស្វាយ។
+ ណែនាំក្រុមការងារបច្ចេកទេសត្រូវពន្លឿនការសិក្សាអំពីផ្លូវនានានៅក្នុងឃុំដើម្បីរដ្ឋបាលខេត្តមានវិធានការណ៍ដោះស្រាយ
*ជាទីបញ្ចប់ឯកឧត្តមអភិបាលបានឧបត្ថម្ភ និងផ្តល់៖
+ ផ្តល់អាគារសាលាឃុំ ០១ អគារដល់ឃុំសំរោងធំ ដែលត្រូវបើកការដ្ឋានសាងសង់នាថ្ងៃទី២១ ខែមេសា ឆ្នាំ២០១៧ ខាងមុខនេះ
+ឧបត្ថម្ភដល់អ្នកចូលរួមចំនួន ១១២៥ នាក់ ក្នុងម្នាក់ៗទទួលបានថវិកាចំនួន ២ មុឺនរៀល សុបថវិកាចំនួន ២២ លាន ៥សែន រៀល៕
នៅវត្តសំរោងធំ ភូមិសំរោងក្អែរ ឃុំសំរោងធំ ស្រុកកៀនស្វាយ ខេត្តកណ្តាល មានរៀបចំពិធីសំណេះសំណាលជាមួយប្រជាពលរដ្ឋចំនួន ៥ ភូមិ
